Terbunja debuton me fitore në boksin profesionist

Linkoping, Suedi, 27 Prill 2012 – Pjesëmarrësi i Lojrave Olimpike “Pekini 2008″, Naim Terbunja ka debutuar sonte me fitore ndaj serbit Vladimir Spasojevic. Dueli u zhvillua në katër raunde, ndërsa Terbunja tregoi klasë duke treguar boks cilësor duke kënaqur më shumë se 4000 shikues të pranishëm. Meçin kryesor të kësaj mbrëmje e kishte suedezja Frida Wallberg, por shkëlqimin e mori Terbunja i cili ishte përkrahur nga gjysma e shikuesve të cilit ishin shqiptarë. Terbunja përballë kishte një boksier me përvojë Spasojevic i cili pësoi humbjen e tretë, karshi 4 fitore (3 KO) dhe 1 barazimi.

Kosova Boxing ishte mediumi i parë i cili kontaktoi Terbunjën. Ai ishte mjaft i kënaqur me debutimin:”Jam shumë i lumtur për këtë fitore. Kam treguar performancë të mirë kundër një boksieri mjaft cilësor” theksoi Terbunja për kosovaboxing.org.

E pranishme në përkrahje të Terbunjës, ishte edhe boksierja jonë e mirënjohur Teuta Çuni. Më shumë rreth këtij meçi dhe detajave do t`ju sjellim në ditët në vazhdim.

Artan Vërbica
27 Prill 2012