Nuri Seferi dhe Besim Kabashi më të mirët për 2010

Prishtinë, 30 Dhjetor 2010 – Redaksia/Agjencioni Kosovaboxing.org  shpall edhe këtë vit më të mirët për vitin 2010. Ndryshe nga viti i kaluar këtë vit është risi edhe përzgjedhja e boksierëve në konkurrencën e femërave dhe luftëtarit të MMA. Kosova Boxing vlerëson çdo shqiptar që ka përfaqësuar me dinjitet boksin tonë anë e mbanë botës. Përbërja e zgjedhur nga redaksia jonë, nga kryeredaktori Artan Vërbica, analisti i boksit Avdyl Salihu, Shpend Ahmeti fotoreporter, Albion Blakqori administrator, Krenar Fejzullahu analist, Armend Fetahu analist për kick-box dhe MMA përzgjedhëm më të mirët.

Boksieri më i mirë për vitin 2010 : Nuri Seferi
Kick-boxieri më i mirë për vitin 2010 : Besim Kabashi
Debutuesi më i mirë në boksin profesionist për vitin 2010 : Agron Xhilla
Boksieri më i mirë në boksin amator për 2010 : Donat Avdijaj
Kick-boxieri më i mirë amator për vitin 2010 : Ilir Canolli
Boksierja më e mirë : Teuta Çuni
Boksierja më e mirë në boksin amator : Azize Nimani
Luftëtari më i mirë i ringjeve MMA : Edmond Xhelili

Boksieri i vitit 2010 – Nuri Seferi 
Nuri Seferi ka shënuar vitin më të sukseshëm sa i përket titujve të fituar dhe ka qenë plotësisht boksieri më i sukseshëm profesionist këtë vit. Ishte paraparë të boksonte me 29 Maj, në parameç të duelit Vitali Klitschko dhe Albert Sosnowski, me gjeorgjianin Sandro Siproshvili, por programi vëllezërve Klitschko ishte vonuar me audiencë dhe pas presionit nga TV RTL, boksierit tonë iu mohua të përballet këtë natë. Më pastaj organizatorët e “Klitschko Management Group” kishin kërkuar falje për këtë. Nuriut i kishte shkuar gjysma e vitit pa boksuar por ai zuri hapin e duhur me 5 Qershor, kur boksoi me Jonathan Pasin duke fituar një duel në gjashtë raunde. Ishte kjo një fitore, në një paraduel para se të takohej përsëri me Sandro Siproshvili, gjë që kësaj radhe ndodhi dhe atë për titullin e qmuar WBO të Evropës. Në një luftë të fortë në 12-raunde,  Nuri Seferi shpallet kampion i Evropës . Nuriu u bë boksieri i tretë shqiptar që ka fituar titullin e kampionit evropian, pas Luan Krasniqit dhe Shpend Abazit. Këtë titull prestigjioz Nuriu e mbrojti në vendlindje në Gostivar kundër afrikanit nga Kenia, Douglas Otieno. Nuriu fitoi duelin me Otieno me vendim unanim të gjyqëtarëve. Kjo fitore e bën Nuri Seferin të përmbyll këtë vit, mjaft të sukseshëm.

Kick-boxieri i vitit 2010 – Besim Kabashi 
Besim Kabashi ka shënuar rezultate të pritura këtë vit duke mbrojtur titullin e kampionit -95 kg të versionit WKA dhe duke fituar poashtu titullin tjetër të këtij versioni +95 kg. Kabashi me 20 Mars u takua me estonezin Andrei Monzolo duke e mbrojtur me sukses titullin e kampionit deri -95 kg. Kabashi arriti të fitoj këtë duel me ndërprerje në raund të dytë. Monzolo disa here u gjet në dysheme ku nuk mundi t`i përballoj goditjet e ulëta të këmbëve të Kabashit, Low-kick. Me 15 Shtator sfidoi titullin vakant të versionit WKA +95 kg kundër italianit Luca Panto. Kabashi qysh në raund të pare me një High-Kick i dha fund këtij dueli. Kjo njëherit ishte edhe njëri ndër duelet më të bukur dhe më atraktiv i Besim Kabashit.  Mbrojtja e pare e titullit +95 WKA, e zhvilloi me 4 Dhjetor kundër turkut Mehmet Ozer. Ky duel doli të jetë mjaft i vështirë, pasi Kabashi dy herë u gjet në dysheme por u zgjua dhe luftoi deri në fund dhe nuk lejoi ndonjë befasi dhe pas një seri goditjesh në raundin e tretë, turku u gjet i përfunduar dhe gjyqëtari ndaloi luftën. Pra një vit i mirë ku zhvilloi tre lufta dhe të gjitha i fitoi.

Debutuesi më i mirë për 2010 : Agron Xhilla 
Pas sukseseve që kishte arritur në boksin amator duke qenë i treti në kampionatin evropian për kadet me 2006, dhe duke pasur mjaft suksese në boksin amator, Agron Xhilla kishte vendosur të bëhej profesionist.  Xhilla kishte kaluar një kohë i lënduar dhe më nuk dëshiroi boksin olimpik. 22-vjeçari Xhilla ka qenë debutuesi më i mirë në boksin profesionist këtë vit në boksin shqiptar. Ai zhvilloi gjashtë duele profesioniste duke fituar të gjitha, e ndër to katër me ndërprerje. Xhilla i patrembur fare me vetëm tre duele profesioniste mori një ofertë për të boksuar në Kenija të Afrikës kundër Mustapha Noor për titullin vakant të Afrikës Lindore-Qendrore. Xhilla në një luftë të vështirë arriti të kthehej me titull. Ai kishte pësuar një goditje në kokë nga Noor gjë që e gjyqëtari e ndërpreu duelin duke i dhënë fitoren boksierit tonë. Ky ishte një vit i sukseshëm i tij dhe pritet që edhe në vitet e ardhshmë të vazhdon me suksese të tjera që do t`a presin.

Boksieri më i mirë amator për 2010 : Donat Avdijaj 
Boksieri më i mirë amator shqiptar këtë vit ishte Donat Avdijaj. I riu Avdijaj edhe pse kadet, la gjurmët më të mëdha ndër boksierët shqiptar në botë duke fituar vendin e pestë në botë në kampionatin botëror në Baku të Azerbejxhanit për kadet. Donat Avdijaj në gjiro të parë boksoi me kampionin evropian të juniorëve, polakun Cesare Sametko duke e kaluar pengesën e parë me mjaft suksese. Në gjiro të dytë mposhti ukrainasin Armen Simonyuan duke u kualifikuar në çerekfinale. Në pengesen e tretë hasi rezistencë me rusin Alexander Ivanov ku humb me pikë. Më pastaj Avdijaj u shpall edhe kampion i Gjermanisë në konkurrencën U-21. Avdijaj në gjysmëfinale në u takua me Andreas Wahl të cilin e mposhti me rezultat 6-0. Në finale u takua me Marcus Okogun të cilën e mposhti me rezultat 4-0 duke mos humbur asnjë raund. Përzgjedhësi i kadetëve të Gjermanisë, Hans Birka e vlerëson atë me Luan Krasniqin e ri. “Nëse Kosova fiton statutin e OKB-së dhe pranohet në komitetin olimpik,  atëhere  dëshirë më e madhe për mua do të ishte të marr pjesë për Kosovën në Lojrat Olimpike pasi për botëror, më duket është vonë, sepse kualifikimet fillojnë në fillim të vitit 2011” tha Avdijaj.

Kick-boxieri më i mirë amator për 2010 : Ilir Canolli 
Suksesin që e arriti me 2009 duke u shpallur kampion bote në Thai-box në Punta Umbria në Spanjë dhe nënkampion botëror në kick-box, suksese i  vazhdoi dhe i shtoi edhe më shumë në vitin 2010, duke punuar edhe më shumë dhe duke kërkuar suksese tjera. Vitin 2010, Ilir Canolli e filloi me mjaft motiv të lartë. Në kampionatin individual të Kosovës që u mbajt me 15 Maj, u takua me Yll Maliqin duke sjell njërën ndër luftat më të bukura të zhvilluara në Kosovë ndonjëherë në kick-boxin amator. Canolli iu revanshua për humbjen e vitit 2008. Me ftesën e Federatës së Gjermanisë në kick-box në Simmern afër Stutgardit në turneu WKA Internacional të Gjermanisë, ku u mbajt me 25 Qershor, Canolli arriti deri në finale por u diskualifikua. I irrituar pse i iku ky titull nga dora, ai iu qasë edhe më shumë punës duke triumfuar në kampionatin botëror në muajin Tetor në  Edingburg të Skocisë. Canolli arriti të bëhet kampion i botës në diciplinat Thai-box dhe kick-box duke shënuar gjashtë fitore radhazi. Këto suksese të kick-boxierit tonë e vlerësojmë si kick-boxierin më të mirë të kick-boxit amator për këtë vit.

Boksierja më e mirë për 2010 : Teuta Cuni 
Teuta Çuni ka pasuruar boksin tonë këtë vit duke u bërë boksierja e parë profesioniste shqiptare. Çuni zhvilloi vetëm një duel këtë duke fituar ndaj holandezës Arlene de Freitas me vendim unanim. Çuni ka karierë të ndritshme në boksin amator ku ka arritur rezultate kulminante në të kaluarën në boksin amator.  Çuni ka qenë pesë herë kampione e Suedisë, ndërsa në vitin 2000 ka qenë kampione e evropës dhe me 2001 e treta në kampionatin botëror në boksin amator femërorë. Ajo ka zhvilluar 90 meçe në boksin amator ku ka shënuar 82 fitore dhe vetem 8 humbje. Këto rezultate tregojnë aftësinë e saj dhe ambiciet që i ka tani për boksin profesionist. Teuta është e lindur në Prishtinë mirëpo nga viti 1996 jeton në Suedi. Të gjitha sukseset e saja në boks i ka arritur në Suedi. Ajo është shpresë e madhe e boksit femëror dhe priten rezultatet tjera në vitin e ardhshëm.

Boksierja më e mirë amatore për 2010 : Azize Nimani 
Azize Nimani është shpallur kampione e Gjermanisë për herë të tretë në kategorinë deri 54 kg, në kampionatin e Gjermanisë për konkurrencën e femrave e zhvilluar nga 7 deri 11 Korrik në Wismar. Në duelin e parë u takua me ish-kampionen e Gjermanisë së vitit 2008, Brita Wolf të cilën e mundi pa problem me rezultat 11-4. Kjo luftë e plasoi në gjysmëfinale ku më pastaj u takua me Natalie Bauer të cilën e mposhti me 10-3. Në finale u takua me Jenny Runge të cilën e deklasoi duke e mposhtur me ndërprerje në raund të parë. Nimani morri pjesë edhe në kampionatin botëror me 10 Shtator në Barbados por u eliminua në xhiro të parë nga kundërshtarja e Koresë së Veriut, Kim Hye. Kampionja e trefishtë e Gjermanisë ka perspektiv të madhe në boksin olimpik. 18-vjeçarje do të fitoj përvoj deri vitin 2012 kur mbahen Lojrat Olimpike në Londër. Gjermani pret medalje nga boksierja jonë.

Luftëtari më i mirë i ringjeve MMA për 2010 : Edmond Xhelili
Edmond Xhelili ka qenë i sukseshëm edhe në vitin 2010. Xhelili i cili u përmbledh në përfaqësuesën Amerikane në 2009 duke shënuar fitore kundër Kanadës,  ai shënoi edhe një sukses këtë vit duke fituar titullin “Tuff N`uff ” në kategorinë e mesme kundër Tim Bawman. Më pastaj Xhelili pësoi një humbje ndaj Jeffrey Anderson me vendim unanim, por prapë të mund të quhet vit i sukseshëm për luftëtarin tonë perspektiv. Luftëtari ynë vjen nga lugina e Preshevës dhe ka një të ardhme të ndritshme në këtë diciplinë luftarake. Xhilili jeton në Leas Vegas të SHBA-ve nga viti 1999.

KosovaBoxing.org
31 Dhjetor 2010