Haxhi Krasniqi dhe Gjetan Keta të gatshëm për përballjet e së shtundes

Foto : Eroll Popova

Haxhi Krasniqi dhe Gjetan Keta do të boksojnë të shtunden me 9 Prill në Magdeburg të Gjermanisë.  Krasniqi për kundërshtar do të ketë afrikanin nga Ghana, Ben Nsafoah. Krasniqi i cili çdo ditë po forcohet më shumë, pret një fitore të radhës. “Jam mjaft mirë i përgaditur. Pres që të fitoj dhe ti gëzoj të gjithë adhuruesit e mi, dhe posaqërisht adhuruesit e mi shqiptar” theksoi Haxhi Krasniqi për Kosovaboxing.org.

Kundërshtari i tij, Nsafoah ka bilanc prej 9 fitore (4 KO), 4 humbje dhe 2 barazime. Krasniqi aktualisht rangohet si i 49-ti në boxrec.com, dhe fitorja e radhës do t`a ngritë atë edhe më tepër. Pas këtij dueli Krasniqi pret që të zhvilloj një meç për titullin IBF Junior në Mynih, me datë, 23 Maj ose 3 Qershor. Kjo luftë për titull do të mundësohet nga kompania e tij promovuese e boksit, SES Boxing. “Do të kam një meç të rëndësishëm në fund të muajit Maj, apo në fillim të muajit Qershor, për titullin IBF Junior. Ky meç do të jetë mjaft i rëndësishëm dhe besoj që do të dal, ngadhënjyes” tha Krasniqi.

Gjetan Keta poashtu do të synoj fitoren e radhës ndaj gjermanit Markus Senf i cili ka bilanc prej 4 fitore, 17 humbje dhe 2 barazime. Keta ka rekord prej 9-1-0 dhe pritet fitorja e radhës këtë të shtunde ti takoj boksierit tonë nga Bulqiza. Nga rikthimi i tij vitin e kaluar në boksin profesionist, Keta ka shënuar progres të shkëlqyeshëm duke shënuar gjashtë fitore radhazi.

Duelet e dy boksierëve tanë do të jenë parameçe për titullin e kampionit botëror, ku boksieri gjerman Robert Stieglitz do të mbroj titullin kundër gjeorgjianit Khoren Gevor.

Fotoreporteri ynë Eroll Popova do të jetë fotografi zyrtar i kësaj ngjarje të boksit në Magdeburg. Ai poashtu na ka sjell disa foto, ku shihen pamjet dhe qasjet dy ditë para ndeshjeve.

Artan Vërbica
7 Prill 2011