Holyfield fiton me TKO 8 kundër Botha
2 min readThomas & Mack Center, Las Vegas, 11Prill 2010 – Legjenda e boksit botërorë, 47-vjeçari Evander Holyfield 43-10-2 (28 KO) ka shënuar fitore me “Knock-Out” teknik në raund të tetë kundër 41-vjeçarit Francois Botha 47-5-3 (28 KO). Në raundet e para Botha ishte mjaft i mirë, por në raundet e tjera ishte Holyfield që dominoi luftën. Holyfield filloi të tregoj veten se ende vlen në raundin e gjashtë ku tregoi disa sulme brilante, më pastaj në raundin e shtatë e lëndoi mjaft shumë, dhe në raundin e tetë përsëri Holyfield e dërmoi duke i dhënë “Knock-Down” ku gjyqëtari në ring, Russell Mora e përfundoi duelin. Me këtë fitore Holyfield i shtoi bagazhit të tij të suksesit edhe një titull, atë WBF.
Pas duelit të dy boksierët dhanë prononcimet e luftës së zhvilluar: “ Ai është një boksier shumë i mirë defansivë. Ai është i menqur poashtu. Dora e tij e djathtë ka energji të tepruar për një njeri të madh si ai. I dhashë nga vetvetja më të mirën në raundin e shtatë. Dua të kthehem përsëri në ring, sa më shpejtë” deklaroi katër herë kampioni i botës, Evander Holyfield, duke treguar se ende nuk e ka ndërmend të pensionohet.
“Holyfield është boksier i mirë. Ai përfitoi në gabimet e mia. Mendova që në fillim që do të jetë i imi, por gabova. Tani më mbetet të shkoj te shtëpia dhe të bisedoj me ekipin tim” deklaroi Botha.
Kosovaboxing.org
11 Prill 2010